అస్సాంలో పోలీసులు నిర్వహించిన ప్రత్యేక ఆపరేషన్‌లో భారీ బంగారం స్మగ్లింగ్ రాకెట్‌ను ఛేదించారు. ఖార్‌ఘలి ప్రాంతంలో బంగారం అక్రమ రవాణా జరుగుతోందన్న విశ్వసనీయ సమాచారంతో చేపట్టిన దాడుల్లో సుమారు రూ.54 కోట్ల విలువైన 37.064 కిలోల బంగారాన్ని స్వాధీనం చేసుకున్నారు.

ఈ కేసులో ఒక నిందితుడిని అదుపులోకి తీసుకున్న పోలీసులు, స్వాధీనం చేసుకున్న బంగారం భారత్–మయన్మార్ సరిహద్దు ప్రాంతంలో కార్యకలాపాలు నిర్వహిస్తున్న అంతర్జాతీయ స్మగ్లింగ్ నెట్‌వర్క్‌కు చెందినదిగా అనుమానిస్తున్నారు. ఈ కోణంలో దర్యాప్తు కొనసాగుతోందని అధికారులు తెలిపారు.

పోలీసులు గ్రూపులుగా విడిపోయి నిర్వహించిన ప్రత్యేక ఆపరేషన్‌లో బంగారంతో పాటు 13 గ్రాముల వెండి, నాలుగు మొబైల్ ఫోన్లు, రూ.3,755 నగదు కూడా స్వాధీనం చేసుకున్నారు.

ఈ ఆపరేషన్ అస్సాం రాష్ట్ర చరిత్రలోనే అతిపెద్ద బంగారం స్మగ్లింగ్ పట్టివేతల్లో ఒకటిగా భావిస్తున్నారు. కేసుకు సంబంధించిన పూర్తి వివరాలను త్వరలో వెల్లడిస్తామని పోలీసులు తెలిపారు. ప్రస్తుతం ఈ స్మగ్లింగ్ ముఠాకు సంబంధించిన ఇతర నిందితులను గుర్తించే పనిలో దర్యాప్తు బృందాలు నిమగ్నమయ్యాయి.