వేసవి సెలవులు ముగిసి పాఠశాలలు, కళాశాలలు తిరిగి ప్రారంభమైన నేపథ్యంలో విద్యార్థుల్లో మత్తు పదార్థాల వినియోగాన్ని అరికట్టేందుకు హైదరాబాద్ పోలీసులు ప్రత్యేక చర్యలు చేపట్టారు. డ్రగ్స్, గంజాయి వంటి మాదక ద్రవ్యాల బారిన పడకుండా విద్యార్థులను కాపాడేందుకు తల్లిదండ్రులు, ఉపాధ్యాయులు అప్రమత్తంగా ఉండాలని సూచించారు.

విద్యార్థుల ప్రవర్తనలో అకస్మాత్తుగా మార్పులు, చదువుపై ఆసక్తి తగ్గడం, కుటుంబ సభ్యుల నుంచి దూరంగా ఉండడం, కొత్త స్నేహితులతో అనుమానాస్పదంగా తిరగడం వంటి లక్షణాలు కనిపిస్తే వెంటనే అప్రమత్తం కావాలని పోలీసులు తెలిపారు. మత్తు పదార్థాల సరఫరాదారులు విద్యార్థులను లక్ష్యంగా చేసుకునే అవకాశమున్నందున విద్యాసంస్థల యాజమాన్యాలు కూడా ప్రత్యేక నిఘా పెట్టాలని సూచించారు.

పాఠశాలలు, కళాశాలల్లో యాంటీ డ్రగ్ కమిటీలను మరింత బలోపేతం చేయాలని, ఉపాధ్యాయులు, తల్లిదండ్రులు కలిసి విద్యార్థుల్లో అవగాహన పెంచాలని అధికారులు కోరారు. అనుమానాస్పద వ్యక్తులు లేదా మత్తు పదార్థాల విక్రయం గురించి సమాచారం తెలిసిన వెంటనే పోలీసులకు తెలియజేయాలని విజ్ఞప్తి చేశారు.

మత్తు పదార్థాల నిర్మూలన కోసం అవగాహన కార్యక్రమాలు, కౌన్సెలింగ్, ప్రత్యేక తనిఖీలు నిర్వహిస్తున్నామని హైదరాబాద్ పోలీసులు తెలిపారు. విద్యార్థుల భవిష్యత్తు దృష్ట్యా సమాజంలోని ప్రతి ఒక్కరూ బాధ్యతగా వ్యవహరించాలని అధికారులు పిలుపునిచ్చారు.