ప్రముఖ యూట్యూబర్ ‘నందూస్ వరల్డ్’ ఛానల్ నిర్వాహకురాలు రమానందన, ఆమె భర్త జాగర్లమూడి మధుకర్పై మోసం ఆరోపణలు తీవ్ర చర్చనీయాంశంగా మారాయి. ప్రస్తుతం యూకేలో నివసిస్తున్న ఈ దంపతులు తమ సోషల్ మీడియా గుర్తింపును ఉపయోగించి విదేశీ ఉద్యోగాలు, వీసా రెన్యూవల్స్, CoS (Certificate of Sponsorship) ఇప్పిస్తామని చెప్పి పలువురి నుంచి భారీ మొత్తాలు వసూలు చేశారనే ఆరోపణలు ఎదుర్కొంటున్నారు.
వివరాల ప్రకారం, గుంటూరు, విజయవాడ, హైదరాబాద్ నగరాల్లో ‘డెస్టినీ కన్సల్టెన్సీ’ పేరుతో కార్యాలయాలు నిర్వహిస్తూ విదేశీ ఉద్యోగాల కోసం దరఖాస్తు చేసుకునే వారి నుంచి డబ్బులు తీసుకున్నట్లు ఫిర్యాదులు వచ్చాయి.
ఎన్టీఆర్ జిల్లా కొత్తూరుకు చెందిన శివ క్రాంతి కుమార్ అనే వ్యక్తి ఫిర్యాదు మేరకు, లండన్లో చదువుకునే సమయంలో మధుకర్తో పరిచయం ఏర్పడిందని, అనంతరం వీసా రెన్యూవల్, తన భార్యకు ఉద్యోగం ఇప్పిస్తామని చెప్పి రూ.15 లక్షలు తీసుకున్నారని ఆరోపించారు. 2023లో నిందితులు సూచించిన రెండు బ్యాంకు ఖాతాలకు ఆ మొత్తాన్ని బదిలీ చేసినట్లు ఫిర్యాదులో పేర్కొన్నారు.
ఈ ఫిర్యాదు ఆధారంగా గత ఏడాది నవంబర్లో ఇబ్రహీంపట్నం పోలీస్ స్టేషన్లో కేసు నమోదైంది. కేసులో మధుకర్ను A1గా, రమానందనను A2గా, మోహన్రావును A3గా చేర్చినట్లు సమాచారం. నోటీసులు జారీ చేసినప్పటికీ స్పందన రాలేదని తెలుస్తోంది.
ఇదిలా ఉండగా, కేసు నమోదు తర్వాత సోషల్ మీడియాలో స్పందించిన రమానందనపై కూడా విమర్శలు వ్యక్తమవుతున్నాయి. బాధితుల ఆరోపణలను ఖండిస్తూ వీడియోలు విడుదల చేస్తున్నారని, ‘విమెన్ విక్టిమ్ కార్డు’ ఉపయోగించి సానుభూతి పొందే ప్రయత్నం చేస్తున్నారని కొందరు ఆరోపిస్తున్నారు.
అయితే ఈ ఆరోపణలపై నిందితులు తమ వాదనను వినిపించే అవకాశం ఇంకా ఉంది. కేసు ప్రస్తుతం న్యాయపరమైన విచారణలో ఉండటంతో తుది నిజానిజాలు కోర్టు విచారణ అనంతరం మాత్రమే తేలనున్నాయి.
కేసు వెలుగులోకి వచ్చిన తర్వాత దేశంలోని పలు రాష్ట్రాల నుంచి మరికొందరు తమను కూడా మోసం చేశారని సోషల్ మీడియాలో పోస్టులు చేస్తున్నారు. కొందరు బాధితులు ఒక్కొక్కరి నుంచి రూ.20 లక్షల వరకు వసూలు చేశారంటూ ఆరోపణలు చేస్తున్నారు. అయితే ఈ ఆరోపణలన్నీ అధికారికంగా నిరూపించాల్సి ఉంది.