హైదరాబాద్లోని సీతారాంబాగ్ ప్రాంతంలో నకిలీ చాక్లెట్ల తయారీ కేంద్రం గుట్టును హెచ్-ఫాస్ట్ (H-FAST) మరియు ఫుడ్ సేఫ్టీ అధికారులు సంయుక్తంగా నిర్వహించిన దాడుల్లో బయటపెట్టారు. "విగ్నేట్ ఫుడ్ స్పెషాలిటీస్ ప్రైవేట్ లిమిటెడ్" పేరుతో నడుస్తున్న ఈ కేంద్రంలో గడువు ముగిసిన ఫ్లేవర్లు, కృత్రిమ రంగులు మరియు నాసిరకం పదార్థాలతో చాక్లెట్లు తయారు చేస్తున్నట్లు గుర్తించారు.
దాడుల్లో సుమారు 200 కిలోల క్యారమెల్ చాక్లెట్లతో పాటు భారీ మొత్తంలో ముడి పదార్థాలు, యంత్రాలు, ఎక్స్పైర్డ్ రసాయనాలను అధికారులు స్వాధీనం చేసుకున్నారు. తయారీ తేదీ, గడువు తేదీ, బ్యాచ్ నంబర్లు వంటి తప్పనిసరి వివరాలు లేకుండానే ఉత్పత్తులను మార్కెట్లో విక్రయిస్తున్నట్లు విచారణలో తేలింది.
అలాగే పాత FSSAI లైసెన్స్ నంబర్ను ఉపయోగించి ఉత్పత్తులు విక్రయించడం, సంస్థలో పనిచేస్తున్న సిబ్బందికి అవసరమైన మెడికల్ ఫిట్నెస్ సర్టిఫికెట్లు లేకపోవడం వంటి పలు నిబంధనల ఉల్లంఘనలు వెలుగులోకి వచ్చాయి.
ఈ వ్యవహారంలో కేంద్ర నిర్వాహకుడు కొండ కార్తీక్ను అధికారులు అరెస్ట్ చేశారు. హబీబ్నగర్ పోలీస్ స్టేషన్లో భారతీయ న్యాయ సంహిత (BNS) సెక్షన్ 318(4), 275 కింద కేసు నమోదు చేసి దర్యాప్తు కొనసాగిస్తున్నారు.
ప్రజలు ఆహార పదార్థాలు కొనుగోలు చేసే సమయంలో తయారీ తేదీ, గడువు తేదీ, FSSAI లైసెన్స్ వివరాలు తప్పనిసరిగా పరిశీలించాలని ఫుడ్ సేఫ్టీ అధికారులు సూచించారు.