ప్రపంచ వాతావరణాన్ని ప్రభావితం చేసే కీలక ప్రకృతి దృగ్విషయమైన ఎల్‌నినో (El Niño) 2023 తర్వాత మళ్లీ పసిఫిక్ మహాసముద్రంలో రూపుదిద్దుకుంటోంది. అమెరికా వాతావరణ సంస్థ NOAA, ప్రపంచ వాతావరణ సంస్థ (WMO) అంచనాల ప్రకారం 2026 ద్వితీయార్థంలో ఎల్‌నినో పూర్తిస్థాయిలో అభివృద్ధి చెందే అవకాశం ఉంది.

కొన్ని అంతర్జాతీయ వాతావరణ నమూనాలు ఈసారి ఎల్‌నినో అత్యంత తీవ్ర స్థాయికి చేరవచ్చని సూచిస్తున్నాయి. సముద్ర ఉపరితల ఉష్ణోగ్రతలు సాధారణ స్థాయిల కంటే గణనీయంగా పెరగవచ్చని, దీంతో ప్రపంచవ్యాప్తంగా వేడి తరంగాలు, కరువులు, వరదలు, అటవీ అగ్నిప్రమాదాలు పెరిగే ప్రమాదం ఉందని నిపుణులు చెబుతున్నారు.

భారత్ సహా ఆసియా దేశాలపై దీని ప్రభావం ఎక్కువగా ఉండే అవకాశం ఉంది. ముఖ్యంగా వర్షపాతం తగ్గడం, వ్యవసాయ ఉత్పత్తిపై ప్రభావం, ఆహార ధరల పెరుగుదల వంటి పరిణామాలు చోటుచేసుకోవచ్చని హెచ్చరికలు వెలువడుతున్నాయి.

NOAA అంచనా ప్రకారం ఎల్‌నినో ఏర్పడే అవకాశాలు 80 శాతానికి పైగా ఉండగా, 2026 చివరి వరకు కొనసాగేందుకు 90 శాతానికి పైగా అవకాశం ఉంది. అయితే దాని ఖచ్చితమైన తీవ్రతపై ఇంకా శాస్త్రవేత్తలు అధ్యయనం కొనసాగిస్తున్నారు.

వాతావరణ మార్పుల ప్రభావం ఇప్పటికే పెరుగుతున్న నేపథ్యంలో, ఈ ఎల్‌నినో ప్రపంచ ఉష్ణోగ్రతలను మరింత పెంచి వాతావరణ అస్థిరతకు దారితీయవచ్చని నిపుణులు ఆందోళన వ్యక్తం చేస్తున్నారు.