హైదరాబాద్లోని నాంపల్లిలో బీజేపీ రాష్ట్ర కార్యాలయం వద్ద బుధవారం ఉద్రిక్త పరిస్థితులు నెలకొన్నాయి. తెలంగాణ బీజేపీ రాష్ట్ర అధ్యక్షుడు ఎన్. రాంచందర్ రావు నేతృత్వంలో గాంధీ భవన్ ముట్టడికి బయలుదేరిన బీజేపీ శ్రేణులను పోలీసులు అడ్డుకోవడంతో అక్కడ ఉద్రిక్త వాతావరణం ఏర్పడింది.
కాంగ్రెస్ ప్రభుత్వ విధానాలకు నిరసనగా చేపట్టిన ఈ కార్యక్రమంలో పాల్గొన్న కార్యకర్తలు గాంధీ భవన్ వైపు ర్యాలీగా సాగుతుండగా, పోలీసులు వారిని నిలువరించారు. ఈ సందర్భంగా పోలీసులకు, బీజేపీ కార్యకర్తలకు మధ్య తోపులాట, నెట్టివేత చోటుచేసుకుంది.
పరిస్థితి అదుపు తప్పకుండా ఉండేందుకు పోలీసులు బీజేపీ రాష్ట్ర అధ్యక్షుడు రాంచందర్ రావుతో పాటు పలువురు ముఖ్య నాయకులను అదుపులోకి తీసుకుని పోలీస్ స్టేషన్కు తరలించారు.
రాంచందర్ రావు అరెస్టు వార్తతో బీజేపీ కార్యకర్తలు ఆగ్రహం వ్యక్తం చేస్తూ రోడ్డుపై బైఠాయించి ప్రభుత్వానికి వ్యతిరేకంగా నినాదాలు చేశారు. దీంతో నాంపల్లి పరిసర ప్రాంతాల్లో కొంతసేపు వాహనాల రాకపోకలకు అంతరాయం ఏర్పడి ట్రాఫిక్ జామ్ ఏర్పడింది.
పరిస్థితిని దృష్టిలో ఉంచుకుని పోలీసులు నాంపల్లి, బీజేపీ రాష్ట్ర కార్యాలయం, గాంధీ భవన్ పరిసరాల్లో భారీగా బలగాలను మోహరించి భద్రతను కట్టుదిట్టం చేశారు. పరిస్థితిని ఎప్పటికప్పుడు పర్యవేక్షిస్తూ శాంతిభద్రతలు భంగం కలగకుండా చర్యలు చేపట్టారు.